ТОШКЕНТ, 16 янв — Sputnik. Ўзбекистон президенти Шавкат Мирзиёевнинг Сингапурга ташриф давомийлиги 3 кундан 1 кунга қисқартирилади. Бу ҳақда давлат раҳбари аҳолини энергия ресурслари билан узлуксиз таъминлаш бўйича кўрилаётган чоралар юзасидан кенгайтирилган йиғилишда маълум қилди, деб хабар берди президент матбуот котиби.
Президентнинг сўзларига кўра, у мамлакатдаги энергетика ва коммунал тизимларда юзага келган аҳволни инобатга олиб, шундай қарорга келган.
Мирзиёев Сингапурнинг коррупцияга қарши курашиш борасидаги қимматли тажрибасини ўрганиш лозимлиги, қолаверса, бу давлатдан 4,7 миллиард долларгача қўшимча инвестиция жалб қилиш режалаштирилгани учун ҳам бу ташриф муҳим аҳамиятга эга эканини қайд этди.
Хусусан, самарасиз ишлаётган давлат корхоналарини хусусийлаштиришга ҳам инвестициялар жалб қилинади.
Шавкат Мирзиёевнинг Сингапурга давлат ташрифи 16-18 январь кунларига режалаштирилган эди. Ўзбекистон раҳбари Сингапур президенти ва бош вазири билан олий даражада учрашув ва музокаралар ўтказиши керак эди.