ТОШКЕНТ, 16 янв — Sputnik. Президент Шавкат Мирзиёев Давлат хавфсизлик хизмати (ДХХ) ва Бош прокуратурага бугун лавозимидан озод этилган мутасаддиларнинг фаолиятини ўрганишни буюрди. Бу ҳақда давлат раҳбари матбуот котиби маълум қилди.
Бугун давлат раҳбари ҳузурида қиш мавсумида аҳолини энергия ресурслари билан узлуксиз таъминлаш бўйича кўрилаётган чоралар юзасидан кенгайтирилган йиғилиш бўлиб ўтди.
Президент юзага келган вазият соҳалар ҳамда ҳудуд раҳбарларининг бугунги кунгача қандай ишлаганини яққол кўрсатиб қўйганини таъкидлади. Айниқса, Тошкент шаҳрининг барча даражадаги раҳбарлари бугунги ҳолатга умуман тайёр эмаслиги кескин танқид қилинди.
Қиш мавсумига лозим даражада тайёргарлик кўрмагани учун пойтахт ҳокими Жаҳонгир Ортиқхўжаев лавозимидан озод этилди. Юнусобод, Мирзо Улуғбек, Учтепа туманлари ҳокимларига ҳайфсан берилди. Шунингдек, "Иссиқлик электр станциялари" акциядорлик жамияти раиси Фарҳод Абдураҳмонов, энергетика вазири ўринбосари Шерзод Ходжаев лавозимидан озод этилди.
“Ҳудудий электр тармоқлари” раҳбари Улуғбек Мустафоев, “Ўзтрансгаз" раҳбари Беҳзод Норматов ва “Ўзбекнефтгаз” раҳбари Меҳриддин Абдуллаев ҳам лавозимидан озод этилиб, уларга вазифасини бажарувчи лавозимида 3 ой синов муддати белгиланди.
ДХХ ва Бош прокуратурага бугун лавозимидан озод этилган мутасаддиларнинг фаолиятини ўрганади. Президент топшириғига кўра, агар қонун бузилишлар аниқланса, қатъий жавобгарликка тортилади.