ТОШКЕНТ, 15 янв — Sputnik. Сурхондарё вилоятининг Термиз шаҳар ва Шеробод тумани газ таъминоти бўлими раҳбарлари эгаллаб турган лавозимидан озод этилди. Бу ҳақда вилоят ҳокимлиги матбуот хизмати хабар берди.
Вилоят ҳокими Улуғбек Қосимов ўтказилган муҳокама йиғилишида ҳудудларда бир қатор муаммолар аниқланганини таъкидлаб, масъулларнинг муаммоларни ҳал этишдаги фаолияти қониқарсиз эканини қайд этган.
Жумладан, биринчи навбатда аҳолига газ етказиб бериш лозимлиги белгиланган бўлса-да, Термиз шаҳри ва Шеробод туманида умумий овқатланиш шохобчалари, ҳаммом ва бошқа тармоқдан узилиши керак бўлган объектлар табиий газдан фойдаланиб келган.
Таъкидланишича, ҳудуд масъуллари бу ҳолатни назоратсиз қолдиришган, шунингдек, бу ҳудудларда газ соҳаси билан боғлиқ қатор муаммолар мавжуд. Уларни бартараф этиш бўйича тизимли ишлар йўлга қўйилмаган.
Қосимов фаолиятида хато-камчиликларга йўл қўйгани сабабли Термиз шаҳар ва Шеробод тумани газ таъминоти бўлими раҳбарларини эгаллаб турган лавозимидан озод этиш бўйича топшириқ берди.