ТОШКЕНТ, 7 янв — Sputnik. "Толибон"* шаҳзода Гаррини инсониятга қарши жиноятлар учун суд олдида жавоб беришга чақирди. Бу ҳақда CNBS телеканали хабар берди.
Аввалроқ ОАВда қиролича Елизавета II набирасининг 10 январдан сотувга чиқариладиган янги автобиографиясидан парчалар пайдо бўлган эди. Унда Сассекс герцоги Афғонистонда хизмат қилаётганда 25 нафар толибни ўлдирганини маълум қилган.
“Сиз ўлдирганлар шахмат доналари эмас, балки уларнинг қайтишини кутаётган оилалари бўлган одамлар эди”, - деб ёзган Афғонистон ички ишлар вазирининг катта ёрдамчиси Анас Ҳаққоний Twitter’даги саҳифасида.
"Толибон"нинг* яна бир расмийси, ташкилотнинг сиёсий идораси раҳбари Суҳайл Шаҳин Sky News телеканалига берган интервьюсида шаҳзода Гарри “инсониятга қарши жиноят содир этганини” айтди.
“Улар (толиблар) ўз мамлакатлари озодлиги учун курашувчилар эди, сиз эса (НАТО, жумладан, Британия) босқинчилар эдингиз. Уларнинг иши қонуний эди. Улар халқ қаҳрамонлари, сиз эса уларнинг душмани эдингиз”, - деди Шаҳин.
Унинг қўшимча қилишича, Сассекс герцоги инсониятга қарши жиноятлар бўйича суд томонидан сўроқ қилиниши керак.
Шаҳзода Гарри икки марта Афғонистонда хизмат қилган ва мунтазам равишда "Толибон"га* қарши жанговар операцияларда қатнашган. ОАВ қироллик оиласи аъзоси террорчилик ҳаракати етакчисини йўқ қилишга муваффақ бўлгани ҳақида ёзган.
* Террорчилик фаолияти учун БМТнинг санкциялари остида