ТОШКЕНТ, 3 янв - Sputnik. Мудофаа вазирлиги Ахборот-коммуникация технологиялари ва алоқа ҳарбий институти ҳамда “Киберхавфсизлик маркази” ДУК ўртасида меморандум имзоланди.
Тадбир давомида ахборот-коммуникация технологияларини янада ривожлантириш, хусусан, киберхавфсизлик масалалари, ҳарбий институт курсантлари учун талаб қилинадиган билим ва кўникмалар олиш учун етарли шарт-шароитлар яратиш, қўшимча таълим ташаббусларини ташкил этиш ҳамда қатор устувор вазифалар белгилаб олинди.
Шунингдек, Ахборот-коммуникация технологиялари ва алоқа ҳарбий институти Киберхавфсизлик факультети ўқув моддий базасидаги Киберхавфсизлик лабораториясини очилиш маросими бўлиб ўтди. Ушбу лаборатория факультет курсантларини киберхавфсизлик бўйича билимларини оширишда муҳим аҳамият касб этади.
Эслатиб ўтамиз, Ўзбекистон президентининг 2022 йил 16 февралдаги ПҚ-130-сонли қарорига асосан Ахборот-коммуникация технологиялари ва алоқа ҳарбий институтида “Киберхавфсизлик факультети” ташкил қилинган. Бунга кўра факультет таркибида тармоқ ва ахборот технологиялари билан шуғулланувчи қатор кафедраларга асос солинган.
Ҳозирги кунда бу ерда мазкур кадрлар тайёрлаш жараёни тизимли равишда йўлга қўйилган. Жумладан, киберҳужум векторларини аниқлаш, тармоқ ва ахборот тизимларида заифликларни ўз вақтида бартараф этиш, зарарли дастурларга қарши курашишнинг профилактик усулларини ишлаб чиқиш, таҳдидлар ва уларнинг манбаларини тезкор баҳолаш қобилияти ҳисобга олган ҳолда асосий эътибор амалий машғулотларга қаратилмоқда.