ТОШКЕНТ, 24 дек — Sputnik. Молдова ва НАТО ўртасидаги ҳамкорликнинг фаоллашуви мамлакат хавфсизлигига путур етказади, деди Россия ТИВ раҳбари ўринбосари Михаил Галузин РИА Новости агентлигига.
Россиялик дипломат Кишинёвни бу борада Киевнинг аянчли тажрибасини такрорламасликка чақирди.
“Кишинёв ва НАТО мамлакатлари ўртасида ҳарбий ва ҳарбий-техник соҳадаги ҳамкорликнинг фаоллашуви кўпроқ Молдованинг хавфсизлигига путур етказувчи омил ҳисобланади. Тажриба шуни кўрсатяптики, бирор давлатнинг Ғарб қуролларини ўйламасдан йиғиши ёки ҳудудига НАТО контингентини жойлаштириш унинг хавфсизлиги ва суверенитетини умуман оширмайди, аксинча, уни фалокатга яқинлаштиради”, - деди дипломат.
Молдова ташқи ишлар ва Европа интеграцияси вазири Нику Попеску аввалроқ мамлакат хавфсизлик билан боғлиқ ўта оғир вазиятда экани, шу сабабли мудофаа қобилиятини кучайтириши кераклигини айтган эди. Кишинёв Германия, Руминия ва Франция билан ҳарбий ҳамкорликни фаоллаштиришга ишонади.
Хусусан, Молдова мудофаа вазири Анатолий Носатий ҳаво ҳужумидан мудофаа тизимини яратиш зарурлиги ҳақида гапирди, бироқ Кишинёвда ҳозирда бунинг учун маблағ йўқ.