ТОШКЕНТ, 22 дек — Sputnik. Сўнгги пайтларда айрим қурилиш ташкилотлари қурилиш лойиҳалари ҳудудий архитектура ва шаҳарсозлик кенгаши томонидан тасдиқланмаган ва экспертизадан ўтмаган кўп қаватли уйлардаги хонадонларни сотмоқда.
Натижада бундай хонадонларни сотиб олиш бўйича шартнома тузган фуқаролар турли муаммоларга дуч келмоқда. Масалан, улар уй-жойни ўз номига расмийлаштиришда қийналяпти. Бундай уйларни сув таъминоти, газ қувури ва электр тармоқларига улаш мумкин эмас. Ҳокимлик матбуот хизмати ана шундай турар-жой мажмуасини мисол қилиб келтирди.
Қурилиш лойиҳаси ҳудудий архитектура ва шаҳарсозлик кенгаши томонидан тасдиқланмаган ва давлат экспертизасидан ўтмаган бўлса-да, қурувчи Тошкент шаҳри, Тарас Шевченко кўчаси, 23 манзилида жойлашган DahO кўп функцияли мажмуаси лойиҳасида қурилиши режалаштирилган объектларни сотишни бошлаган”, - дейилади хабарда.
Қурилиш ишлари тугалланмаган хонадонлар харидорлари Қурилиш вазирлигининг электрон платформасида қурувчи компания ҳақида ўзларига керакли маълумотларни топишлари мумкин. Аввало, уй рўйхатдан ўтган ёки йўқлигини текшириш керак. Платформада сиз комплекс номи, қурувчи компания номи, манзили каби очиқ маълумотларни олишингиз мумкин.
Фуқаролар қуйидаги ҳуқуқларга эга:
қурилиш майдончасидаги қурилиш ишларининг ҳолати билан танишиш;
шартнома шартларининг бажарилиши тўғрисида қурувчидан ёзма маълумот сўраш;
қурилишнинг боришини, шу жумладан маблағларнинг мақсадли сарфланишини назорат қилиш.