ТОШКЕНТ, 1 дек — Sputnik. Россия иқтисодий ривожланиш вазири Максим Решетников Самарқанд бизнес форумининг очилишида сўзлаган нутқида Россия Ўзбекистон иқтисодиётига сармоя киритаётган энг йирик давлат эканини таъкидлади. Капитал қўйилмаларнинг ҳажми аллақачон 10 миллиард доллардан ошган. Бу ҳақда Sputnik мухбири хабар беради.
Унинг сўзларига кўра, Россия бизнеси анъанавий равишда нефть-газ сектори, автомобиль саноати, телекоммуникация ва қишлоқ хўжалигига сармоя киритади.
“Шу билан бирга, капитал қўйилмаларни диверсификация қилиш доимий равишда ўсиб бормоқда. Нафақат хомашё, балки логистика, қурилиш, фан соҳаларида ҳам қўшма лойиҳалар амалга оширилмоқда. Бу борада бир йилда 700 дан ортиқ қўшма корхона ташкил этилди”, - деди вазир.
Бундан ташқари, айни кунларда форумда IT ва молия соҳалари, авиация, қишлоқ хўжалиги, тўқимачилик саноати каби 170 дан ортиқ Россия компаниялари ишламоқда. Решетниковнинг айтишича, бу кичик, ўрта ва йирик бизнес бўлиб, у ҳам ҳамкорлик лойиҳаларини ишлаб чиқишга тайёр.
“Янги механизмларни, жумладан, қўшма лойиҳаларни молиялаштириш механизмларини яратиш муҳим. Ўхшатиш бўйича, буни Евросиё иттифоқи доирасида амалга оширамиз”, - деди у.
Эслатиб ўтамиз, Самарқандда Ўзбекистон - Россия бизнес форуми бўлиб ўтмоқда. Форум иштирокчилари транспорт-логистика, саноат лойиҳалари, савдо-иқтисодий ҳамкорлик, кичик ва ўрта бизнес ўртасидаги ҳамкорлик каби масалаларни муҳокама қилади.