ТОШКЕНТ, 21 ноя — Sputnik. Сирдарё вилоятида янги иссиқлик электр станция ишга туширилди. У йилига 1,7 млрд кВт-соат электр энергияси ишлаб чиқаради, дея хабар берди Энергетика вазирлиги.
Янги газ-поршенли иссиқлик электр станциясининг қуввати 220 МВт бўлиб, у вилоятнинг Ховос туманида Туркиянинг “Cengiz Enerji” компанияси томонидан қурилган.
Янги станция 20 ноябрь куни соат 10:22да Ўзбекистоннинг ягона электр тармоғига қувват узатишни бошлади.
Сирдарё вилоятидаги янги иссиқлик электр станцияси
© Энергетика вазирлиги
“Станцияда ўрнатилган қурилмаларнинг фойдали иш коэффициенти юқорилиги ҳисобига йилига 150 млн метр куб табиий газ тежалади. Тежалган табиий газ билан қўшимча 685 млн кВт-соат электр энергияси ишлаб чиқариш имкони яратилади”, дейилади хабарда.
Станция қурилиши давомида 700 нафаргача, ишга тушгандан кейин эса 100 нафар янги иш ўрни яратилди.
Сирдарё вилоятидаги янги иссиқлик электр станцияси
© Энергетика вазирлиги
Маълумот учун, 29 март куни Ўзбекистон ва Туркия президентлари томонидан мазкур электр станция қурилишига старт берилган эди.