ТОШКЕНТ, 18 ноя - Sputnik. Кеча, 17 ноябрь куни Қирғизистон Жогорку Кенеши депутатлари Ўзбекистон билан баҳсли бўлиб қолаётган давлат чегарасини делимитация қилиш тўғрисидаги келишувни ратификация қилди. Бу ҳақда РИА Новости мухбири хабар берди.
Депутатлар бирданига учта ўқишда овоз беришди. Битимни ратификация қилиш учун 64 депутат ёқлаб, 19 киши қарши овоз берди.
Қирғиз парламенти депутатлари, шунингдек, Кампиробод (Андижон) сув омборини Ўзбекистонга бериш бўйича келишувни ҳам кўриб чиқди.
Сув омбори бўйича келишувни ратификация қилишга 65 нафар депутат рози, 18 нафари қарши бўлди. Шу тариқа ҳар икки ҳужжат қабул қилинди.
Кампиробод сув омбори (Ўзбекистонда Андижон деб аталади) Қирғизистоннинг Ўзбекистон билан чегара ҳудудида жойлашган. Икки давлат ўртасидаги чегарани делимитация қилиш тўғрисидаги шартнома лойиҳасига кўра, сув омборини сув ресурсларини биргаликда тақсимлаш қоидаларини сақлаб қолган ҳолда 19 минг гектар баҳсли ҳудудлар эвазига Ўзбекистонга ўтказиш режалаштирилган. Қирғизистонда Кампиробод сув омборидан воз кечмаслик талаби билан бир қанча акция ва митинглар ўтказилди.
Шу ўринда Қирғизистон ва Ўзбекистон ўртасидаги муносабатлар қарийб ўн йиллик сезиларли совуқликдан сўнг 2017 йилда фаоллашди. Ўша йили томонлар давлат чегараси тўғрисида муваққат шартнома имзоладилар, унга кўра икки давлат тарихида биринчи марта давлат чегараси чизиғининг қарийб 85 фоизи белгиланди. 2017 йил октябрь ойида ҳужжат кучга кирди. 2022 йилнинг ноябрида томонлар делимитация ва демаркация жараёнини якунлашга келишиб олдилар.