ТОШКЕНТ, 27 окт — Sputnik. Энди I ва II гуруҳ ногиронлик пенсияси тайинланганидан кейинги ишланган вақт иш стажига қўшилади. Бу президент имзолаган 795-сонли қонунда назарда тутилган.
Ҳужжатга кўра, агар ихтисослашган тиббий муассасаларнинг шифокорлари ва ўрта тиббий ходимлари шаҳарчалар, қишлоқлар ҳамда овулларда камида 25 йил ишлаган бўлса, уларнинг охирги иш жойидан қатъи назар, белгиланган ёшни 5 йилга қисқартирилган ҳолда пенсия олиш ҳуқуқига эга бўлади.
Ҳисоблаб чиқарилган пенсияларга устама ҳақлар Ўзбекистон олдида алоҳида хизматлари бўлган шахсларга – пенсияни ҳисоблаш базавий миқдорининг 100 фоизидан 150 фоизигача белгиланади.
I ва II гуруҳ ногиронлик пенсияси тайинланганидан кейин камида 1 йил иш стажига эга бўлса, фуқаронинг аризаси асосида иш стажи ва иш ҳақи инобатга олинган ҳолда пенсия ҳар икки йилда бир маротаба қайта ҳисоблаб чиқилади. Бунда пенсияни қайта ҳисоблаш мурожаат қилган санадаги ёшга нисбатан талаб қилинган иш стажидан келиб чиққан ҳолда амалга оширилади.
Ўгай ота ва ўгай онанинг вафот этган ўгай ўғилни (қизни) тарбиялаганлиги ёки боққанлигини аниқлаш, пенсиясига устама тўлаш Вазирлар Маҳкамаси томонидан белгиланади.