ТОШКЕНТ, 21 окт - Sputnik. Россияда сафарбар қилинган 10 мингга яқин киши шу кунгача турли сабабларга кўра ватанига қайтарилди. Бу ҳақда бугун журналистларга Давлат думасининг Мудофаа бўйича қўмитаси раиси Андрей Картаполов Санкт-Петербургда бўлиб ўтган "Ягона Россия" кўнгиллилари билан учрашувда маълум қилди.
“Бугунга қадар мамлакат бўйлаб 10 мингга яқин одам турли сабабларга кўра қайтарилди”, - деди қўмита раҳбари хатолик туфайли сафарбар қилинганлар ҳақидаги саволга жавоб берар экан.
Унинг қўшимча қилишича, Санкт-Петербургда қисман сафарбарлик режаси режага мувофиқ муваффақиятли давом этмоқда.
"Санкт-Петербургда қисман сафарбарлик тадбирлари давом этмоқда ва мен билишимча, улар режа ва шаҳар олган топшириқ асосида олиб бориляпти ва ҳозирча уни муваффақиятли бажармоқда", - деди Картаполов.
Эслатиб ўтамиз, Владимир Путин 21 сентябрь куни Россияда қисман сафарбарлик эълон қилган эди. Давлат раҳбари мурожаатномасида мазкур тарғибот доирасида фақат захирадаги фуқаролар, биринчи навбатда, Қуролли Кучлар сафида муддатли ҳарбий хизматни ўтаган, муайян ҳарбий мутахассислик ва жанговар тажрибага эга бўлган фуқаролар чақирилиши лозимлигини таъкидлади.
4 октябрь куни Россия мудофаа вазири Сергей Шойгу Россия Қуролли кучларига қисман сафарбарлик доирасида чақирилган 200 мингдан ортиқ одам келганини маълум қилди. Унинг қўшимча қилишича, кадрлар тайёрлаш 80 полигон ва олтита ўқув марказида олиб борилади.
Аввалроқ, Россия етакчиси мамлакатда эълон қилинган қисман сафарбарлик бўйича барча чора-тадбирлар икки ҳафта ичида якунланишини тахмин қилганди.