ТОШКЕНТ, 18 окт — Sputnik. Ташқи ишлар вазири Владимир Норов 18-19 октябрь кунлари Тожикистоннинг Душанбе шаҳрида бўлиб ўтадиган юқори даражадаги халқаро конференцияда иштирок этади.
Конференция "Терроризмга қарши кураш ва террорчилар ҳаракатланишининг олдини олиш учун чегаралар хавфсизлиги ҳамда чегара назорати соҳасидаги халқаро ва минтақавий ҳамкорлик" мавзусида бўлиб ўтади.
Тадбир Тожикистон Республикаси ҳукумати, БМТнинг Терроризмга қарши кураш бошқармаси, БМТнинг Марказий Осиё учун превентив дипломатия бўйича минтақавий маркази, Европа Иттифоқи, Европада хавфсизлик ва ҳамкорлик ташкилоти, Саудия Арабистони Подшолиги ва Қатар Давлати томонидан ташкил этилмоқда.
Эслатиб ўтамиз, аввалроқ Владимир Норов Қозоғистон пойтахтида ўтгазилган Мустақил Давлатлар Ҳамдўстлиги Ташқи ишлар вазирлари кенгашининг йиғилишида иштирок этган эди. Унда вазирлар МДҲ доирасидаги халқаро ҳамкорлик ва ўзаро ҳамкорликнинг долзарб масалалари юзасидан фикр алмашиб, бир қатор ҳужжатларни имзолашганди. Шу билан бирга, Ташқи ишлар вазирлари кенгаши кун тартибидаги 7та ҳужжат бўйича якуний қарорлар қабул қилинган.
Бундай ҳужжатлар орасида 2023 йилга мўлжалланган Мустақил Давлатлар Ҳамдўстлиги доирасида кўп босқичли ТИВлараро маслаҳатлашувлар режаси ҳам бор. Унда анъанавий равишда ташқи сиёсатни режалаштириш, Ҳамдўстлик давлатларининг БМТдаги позицияларини мувофиқлаштириш, бошқа халқаро ташкилотлар билан ўзаро муносабатларга оид мавзулар киритилган.