ТОШКЕНТ, 14 окт — Sputnik. "Узтўқимачиликсаноат" уюшмаси раиси Илҳом Ҳайдаровнинг айтишича, Россияда Ўзбекистоннинг кўп маркали тўқимачилик дўконларини ташкил этиш режалаштирилган. Бу ҳақда РИА Новости хабар беради.
"Биз айни вақтда Россияда фаол равишда омборларни яратяпмиз, савдо уйларининг инфратузилмасини ривожлантиряпмиз, ўйлайманки, тез орада ўзбек тўқимачилик маҳсулотлари сотиладиган ўнлаб мултибрендли дўконлар очамиз", - деди Ҳайдаров.
"Узтўқимачиликсаноат" раҳбари Ўзбекистонда тўқимачилик экспортчиларини моддий рағбатлантирилиши, уларга Россиядаги савдо марказларида мавжуд бўш ўринларни эгаллашларига, кўргазмаларда иштирок этишларига ёрдам берилишини қўшимча қилди.
"Биз Россияда жуда фаолмиз, аммо биздан янада фаолроқ бўлиш талаб этилади, чунки бозор катта, у янги, катта ҳажмдаги маҳсулотларни талаб қилади. Шу билан бирга, бу ерда жиддий рақобат мавжуд, гап узоқ вақт аввал ташкил етилган турк брендлари, шунингдек, Хитой ва Ҳиндистон ишлаб чиқарувчилари бозорга агрессив равишда кириб келишлари ҳақида кетмоқда", - дея қўшимча қилди Илҳом Ҳайдаров.
Аввалроқ, йирик савдо марказлари Украинадаги махсус ҳарбий операция сабаб Россияни тарк этишини маълум қилди. бироқ Москва уларнинг ўрнига хорижий чакана савдоларни жалб этиш мақсадида музокаралар олиб борилаётганини билдирди. Кейинчалик Ўзбекистон савдо-саноат палатаси ўзбек компанияларини Россиядаги савдо марказларида мавжуд бўш дўконларни ижарага олишга жалб қилишда ёрдам беришларини маълум қилди.
Россия бозори Ўзбекистондан тўқимачилик маҳсулотлари етказиб бериш бўйича биринчи ўринни егаллашда давом етмоқда: 2022 йил январь-август ойларида бу ҳажм ўтган йилнинг шу даврига нисбатан 38,9% га ўсиб, 823,7 млн долларни ташкил этди.