ТОШКЕНТ, 6 окт – Sputnik. Мексика президенти Андрес Мануэль Лопес Обрадор Европарламентнинг Украина етакчиси Владимир Зеленскийни тинчлик бўйича Нобель мукофотига номзод қилиб кўрсатиш ҳақидаги таклифини танқид қилди. Бу ҳақда Sputnik Тожикистон хабар берди.
“Уни ёки бошқасини [аризачини] қўллаб-қувватлашимиздан қатъи назар, ҳарбий можаро иштирокчиларидан бири қандай қилиб Тинчлик учун Нобел мукофотини олади? Тинчлик учун курашаётган бошқа ҳеч ким йўқми?” - деган сиёсатчи кеча, 5 октябрь куни бўлиб ўтган матбуот анжуманида.
Аввалроқ, “Reuters” Тинчлик бўйича Нобел мукофоти Россия президенти Владимир Путиннинг “оппонентлари”га, жумладан Зеленскийга ҳам берилиши мумкинлиги ҳақида хабар берган эди.
Маълумот учун, 2021 ва 2013 йилларда Россия президенти Владимир Путин Нобел мукофотига номзод этиб кўрсатилган.
Нобель тинчлик мукофоти - Альфред Нобель фонди томонидан ҳар йил топшириладиган нуфузли 5 та мукофотлардан бири бўлиб, дунёда тинчликни мустаҳкамлаш учун қўшган ҳиссаси учун берилади.
Турли йилларда ушбу мукофотга Барак Обама, Альберт Гор, Кофи Анан, Ким Де Жун, Нельсон Манделла, Михаил Горбачев ва бошқалар муносиб деб топилган.
24 февраль куни Россия президенти Владимир Путин Донбасс республикалари раҳбарларининг ёрдам сўраб мурожаатига жавобан Украинада махсус ҳарбий операция ўтказилишини маълум қилди. Шундан сўнг АҚШ, Европа Иттифоқи, Буюк Британия, шунингдек, бир қатор бошқа давлатлар Россияга қарши кенг кўламли санкциялар киритди. Бундан ташқари, Ғарб давлатлари Киевга миллиардлаб долларлик қурол етказиб беришни кучайтирган.