ТОШКЕНТ, 9 сен — Sputnik. Карл III 10 сентябрь куни онаси қиролича Елизавета II вафотидан сўнг расман Британия тахтига ўтиради.
Карл қироличанинг ўлимидан кейин, собиқ тахт вориси сифатида, автоматик тарзда қиролга айланди. Бироқ, Independent ёзишича, анъанага кўра, Валиаҳдлик бўйича кенгаш томонидан расмий маросим ўтказилиши керак. Унинг иштирокчилари монархнинг вафотидан кейин 24 соат ичида Сент-Жеймс саройида йиғилиши лозим.
Қайд этилишича, бу сафар маросим кечроқ амалга оширилади, чунки тайёргарлик учун етарлича вақт бўлмаган.
Шу билан бирга Кенгаш қироличанинг ўлимидан кейинги биринчи парламент йиғилишига қадар бўлиб ўтиши керак, ундан эса, ўз навбатида, иложи борича тезроқ йиғилиш талаб қилинмоқда.
Тарихий нуқтаи назардан, Валиаҳдлик бўйича кенгашда монархнинг маслаҳатчиларидан иборат бўлган Махфий кенгашнинг бутун таркиби иштирок этади ва янги қиролнинг расман тахтга ўтқизилишини кузатади. Бироқ уларнинг сони 700 дан ортиқ бўлгани сабабли, чекловлар киритилган. Маросимда қатнашиш учун Махфий кенгашнинг 200 нафар аъзосигина таклиф қилинган.
Элатиб ўтамиз, қиролича Елизавета II 96 ёшида Шотландиядаги Балморал қасрида вафот этди.
Унинг ўғли, 73 ёшли шаҳзода Чарльз автоматик тарзда қиролга айланди ва ўзига Чарльз III номини олди. Елизавета II доимий шифокор назорати остида бўлган.