ТОШКЕНТ, 8 авг — Sputnik. Запорожье атом электр станциясини (АЭС) Украина артиллерия бригадаси томонидан ўққа тутилиши Украина президенти Владимир Зеленский режимининг ядровий террорчилик ҳаракатидир. Бу ҳақда Россия Мудофаа вазирлиги расмий вакили генерал-лейтенант Игорь Конашенков маълум қилди.
“7 август куни Зеленский режими Херсон ва Запорожье вилоятларида гуманитар фалокат яратиш мақсадида Запорожье атом электр станциясининг энергетика инфратузилмаси объектларида янги ядровий террорчилик актини амалга оширди”, - деди Конашенков.
Унинг сўзларига кўра, атом электр станциясини ўққа тутиш Украина Қуролли кучларининг 44-артиллерия бригадаси бўлинмалари томонидан соат 12:40 да Марганец аҳоли пункти ҳудудидан, Каховка сув омборининг қарама-қарши қирғоғида амалга оширилди.
Конашенковнинг сўзларига кўра, ўққа тутилиш Запорожье ва Херсон вилоятларини электр энергияси билан таъминловчи юқори волтли линияга зарар етказган.
Маълумот ўрнида, якшанба куни Украина ҳарбийлари ҳозирда Россия қўшинлари назорати остида бўлган Запорожье атом электр станцияси ҳудудига зарба беришда давом этган. Энергодардаги отишмалар натижасида камида бир киши ҳалок бўлди.
Барча юзага келган ёнғинлар ўз вақтида ўчирилди, шунингдек, сув олиш мосламасининг шикастланиши туфайли сув таъминотида муаммолар юзага келганлиги хабар қилинди.