ТОШКЕНТ, 29 июн — Sputnik. Ўзбекистонда яратилган "Антиковир" препаратига патент берилди. Бу ҳақда Фармацевтика тармоғини ривожлантириш агентлиги хабар берди.
Ушбу препарат табиий ва минерал манбалар асосида биотехнологик ва кимёвий синтез усули билан кўп компонентли ҳисобланади.
У Фармацевтика таълим ва тадқиқот институти фармацевт ва фармаколог олимлари ҳамкорлигида яртилган.
Айтилишича, клиник текширувларда препаратни ножўя таъсирлари кузатилмаган. 92% беморларда юқори самарали таъсири аниқланди.
“Клиникагача ва клиник текширувларда препаратни коронавирус инфекциясини ҳужайралар ичига киришининг олдини олиш, вирусга қарши самарали таъсир кўрсатиши ва гуморал иммунитетни ошириши аниқланди”, дейилади хабарда.
Препарат компонентлари антикоагулянт, антиоксидант, цитопротектор ва иммун тизимини стимулловчи ҳамда бактериялар ва вирусларга қарши фаолликни таъминлайди.
Маълумот учун, препаратнинг товар белгиси Интеллектуал мулк агентлиги томонидан 2020 йилда рўйхатга олинган эди. Бу йил эса ССВ коронавирус инфекцияси, постковид синдромини даволаш ва профилактика қилиш воситаси сифатида рўйхатга олди.
"Антиковир"га Адлия вазирлиги томонидан патент берилди ҳамда Ихтиролар реестрида рўйхатдан ўтказилди.