ТОШКЕНТ, 28 июн — Sputnik. АҚШнинг Техас штатида жойлашган Сан-Антонио шаҳри чеккасида ташландиқ юк машинаси ичидан мигрант эканлиги тахмин қилинаётган камида 46 кишининг жасади топилди. Бу ҳақда РИА Новости маълум қилди.
Ўт ўчириш бўлими вакилининг маълум қилишича, 16 киши, жумладан, тўрт бола касалхонага етказилган. Омон қолганлар иссиқлик ва узоқ вақт давомида сувсизликдан азият чеккан.
Штат губернатори Грег Эбботт мазкур ҳолатнинг юзага келишига мамлакат президенти Жо Байден ва унинг маъмурияти олиб бораётган иммиграция сиёсатини сабаб қилиб кўрсатди.
“Бу ўлимлар Байденнинг виждонига боғлиқ. Бу унинг ўлимга олиб келадиган очиқ чегара сиёсати натижасидир”, деб ёзади Эбботт ўзининг Twitter саҳифасида.
АҚШнинг собиқ президенти Дональд Трамп иммиграция сиёсати ва чегара назоратини кучайтириш учун бир қатор чора-тадбирларни амалга оширди. Бошқа нарсалар қаторида, у Мексика билан чегарада девор қуриш ташаббуси билан чиқди. Трамп бу чора ноқонуний иммиграция ва гиёҳванд моддалар контрабандасини чеклашга ёрдам беради, деб ҳисоблаган.
Унинг ўрнига келган Жо Байден ўтган йилнинг январь ойида инаугурациясидан кўп ўтмай, мамлакатнинг иммиграция қонунларини юмшатиш бўйича бир қатор фармонларни имзолади. Унинг давлат раҳбари сифатидаги биринчи қадамларидан бири Трамп томонидан Мексика билан чегарадаги вазият муносабати билан жорий этилган фавқулодда ҳолат режимининг бекор қилиниши бўлди. Ушбу қоида АҚШ Конгрессининг фикрини четлаб ўтиб, девор қурилишини молиялаштиришга имкон берди.
Эслатиб ўтамиз, аввалроқ АҚШ Конгресси Вакиллар палатасининг Республикачилар партиясидан бир қатор аъзолари президент Жо Байденнинг муваффақияncиз миграция сиёсати туфайли унга импичмент эълон қилинишини талаб қилган эди. Республикачиларнинг фикрича, Байден “АҚШ чегарасидаги оператив назоратни амалда мексикалик жиноий картелларга топширган”.