ТОШКЕНТ, 15 апр — Sputnik. Маданий меросни ҳимоя қилиш инспекцияси ҳамда Маданий мерос агентлиги “Ичан-Қалъа” давлат музей-қўриқхонаси фондида ҳамда “Ситораи Моҳи Хосса” тарихий мажмуасида реставрация ишларини ўрганди.
Бухородаги "Ситораи Моҳи Хосса" тарихий мажмуасининг реставрация ишлари ҳолатини ўрганиш давомида таъмирлаш ишлари маданий мерос объектларини реставрация қилиш талабларига зид равишда олиб борилгани аниқланди.
“Таъмирлаш-реставрация лойиҳалари махсус Илмий-эксперт кенгаши билан келишилмаган, тегишли рухсатномалар олинмаган ва яна бир қатор талаблар қўпол равишда бузилган. Мажмуада реставрация ишлари нотўғри олиб борилгани туфайли саройнинг бир қатор қисми тарихий ва бадиий аҳамиятини буткул йўқотган”, дейилади хабарда.
Агентлик томонидан ҳар икки обида бўйича ўрганиш ишлари якунлари ҳуқуқий баҳо бериш учун Бош прокуратурага тақдим этилди. Айни вақтда Бош прокуратура томонидан “Ситораи Моҳи Хосса” бўйича мутасадди мансабдор шахсларга нисбатан жиноят иши қўзғатилиб, уларнинг ҳаракатларига ҳуқуқий баҳо берилмоқда.
Ундан ташқари, Хивадаги "Ичан-Қалъа" давлат музей-қўриқхонасида айрим ашёларнинг тавсифларига ўзгартиришлар киритилганлиги юзасидан асословчи ҳужжатлар мавжуд эмас, деб топилди.
“Ашёларни музей фондига қабул қилиш далолатномаларининг 1994 йилгача бўлган қисми музейнинг масъул ходимлари томонидан Ишчи гуруҳга тақдим этилмади. Ўрганиш давомида ноёб ашёлар рўйхатига киритилган ашёлар хатловдан ўтказилганда жами 101 та музей ашёси кирим китоби тавсифномаларига ўлчами, материали, ишланиш услуби ва яратилган даври бўйича мос келмаган”, - дейилади хабарда.
Эслатиб ўтамиз, Вазирлар Маҳкамасининг 110-сонли қарори билан бу йил маданий мерос объектлари инфратузилмасини ривожлантиришга 117,3 млрд сўм маблағ ажратилади.