ТОШКЕНТ, 13 апр — Sputnik. 1 июндан бошлаб Ўзбекистон ёшлар портали негизида яратилган волонтёрлар электрон платформаси ишга туширилади. Бу бўйича Вазирлар Маҳкамасининг 169 – сонли қарори қабул қилинди.
Волонтёрлар платформасида қуйидагилар қайд этилади:
Волонтёрлар гуруҳига киритилган шахсларни ҳисобга олиш;
Волонтёрларнинг тадбир, лойиҳа ва акциялардаги иштироки ва давлат органлари фаолиятига кўмаклашган даври;
Давлат органларининг волонтёрлар билан ишлашига оид методик тавсиялари;
Чет элда волонтёрлик фаолияти билан шуғулланиш.
Ёшлар ишлари агентлиги ушбу платформа фаолияти ва унинг доимий қўллаб-қувватланишини таъминлайди.
Давлат органлари раҳбарлари волонтёрлар жалб этиладиган йўналишлар рўйхати ва ички йўриқномасини тасдиқлайди. Улар давлат органларида ташкил этилган комиссия томонидан суҳбат асосида танлаб олинади.
Волонтёрлик гуруҳларнинг фаол аъзолари давлат органларининг бюджетдан ташқари маблағлари доирасида ҳамда қонунчилик ҳужжатларида тақиланмаган бошқа манбалар ҳисобидан рағбатлантириб борилади.
Давлат органларининг ёшлар билан ишлашга масъул раҳбар ўринбосарларига (маслаҳатчиларига) волонтёрлар билан ишлаш ваколати юклатилади.
Волонтёрликка вояга етган, ўз соҳаси бўйича билим ва кўникмага эга шахслар давлат органлари фаолиятига жалб этилиши мумкин.
Профессионал ва ОТМ таълим олаётган фуқаролар ушбу таълим муассасаларида ўқишдан ташқари вақтларида волонтерлик қилишлари мумкин.
Волонтёр сифатида жалб этилмайдиган фуқаролар:
Муомилага лаёқати белгиланган тартибда чекланган ёки муомилага лаёқатсизлар;
Тегишли соҳа бўйича билим ва кўникмага эга бўлмаганлар;
Давлат органи ходимлари ( ўзи ишлаётган давлат органи фаолиятида);
Судланганлар;
Жиноий жазони ўтаётганлар;
Ҳарбий хизматдагилар;
Диний ташкилотларнинг профессионал хизматчилари.