ТОШКЕНТ, 30 мар — Sputnik. Қозоғистон Нукус – Бейнеу ва Тошкент – Олмаота йўналишидаги халқаро йўловчи поездлари қатновини бошлаш санаси кейинги муддатга кўчирмоқда. Бу ҳақда “Ўзтемирйўлйўловчи” АЖ матбуот хизмати хабар бермоқда.
Таъкидланишича, қўшни давлат бунга мамлакатда карантин чекловлари жорий этилганини сабаб қилиб кўрсатган.
Мазкур қарор Қозоғистон ҳудудида коронавирус инфекцияси пайдо бўлиши ва тарқалишининг олдини олиш бўйича Идоралараро комиссия йиғилиши баённомаси билан тасдиқланган.
Чипта сотиб олган йўловчилардан пулни қайтариб олиш учун темир йўл кассаларига мурожаат қилиш сўралган. Чипталарни кейинги саналарга қайта расмийлаштириб олиш имконияти ҳам бор
Аввалроқ 1 апрелдан бошлаб Нукус – Бейнеу, 2 майдан бошлаб Тошкент-Олмаота йўналишида поезд қатновлари йўлга қўйилиши хабар қилинган эди.