ТОШКЕНТ, 28 мар — Sputnik. Апрель барча тиббиёт марказлари раҳбарлари учун чинакам синов ойи бўлади. Масаланинг моҳиятига кириб, ўз иш фаолиятини ўзгартирмаган раҳбарларга қатъий чоралар кўрилади. Бу ҳақда президент Шавкат Мирзиёев раислигида видеоселектор йиғилишида маълум қилинди.
Йиғилишда тиббиёт соҳаси вакиллари билан очиқ мулоқотда берилган топшириқлар ижросини апрель ойида ташкил этиш кўриб чиқилди.
Давлати раҳбари ўтган ҳафта алоҳида фармойиш имзоланиб, 7 та йўналишдаги 50 та тадбир ва уларнинг ҳар бири учун масъуллар белгиланганини таъкидлади. Амалий ижрони бир кун ҳам кечиктириб бўлмайди.
Шунинг учун, бир ойлик амалий иш тизимига ўтилади. Вазир, ихтисослашган марказ раҳбарлари ва ҳокимлар ўзларининг ойма-ой режасини ишлаб чиқиб, амалга оширади.
Президент ушбу раҳбарларнинг апрель ойи учун иш режалари билан танишиб чиққани ва Қорақалпоғистон, Андижон, Сурхондарё ҳамда Кардиология ва Хирургия марказлари масаланинг сал бўлсаям ичига кирганини маълум қилди. Лекин, қолган марказларнинг ҳам, ҳудудларнинг ҳам иш режаси “шаблон” кўринишида.
“Мисол учун, Урология ва Онкология марказлари апрель ойида вилоятларда бор-йўғи 5 тадан, Акушерлик ва гинекология маркази эса 15 та юқори технологик операция ўтказишни режа қилган. Ёки, Кўз микрохирургияси маркази ходимлари ҳар ойда жойига чиқиб 50 тадан операция ўтказгани билан, апрелда ҳудудга борганда атиги 3 нафар мутахассиснинг малакасини оширмоқчи", - деди давлат раҳбари.
Мирзиёев агар марказлар раҳбарлари ўзи бошчилигида жойларга чиқиб, янги даволаш амалиётларини ўтказмаса, юқори технологик операцияларни ҳудудларда жорий этмаса, вилоят ва туман мутахассисларини бунга ўргатмаса, ўзгариш бўлмаслигини таъкидлади.
Шу боис, апрель марказлар раҳбарлари учун чинакам синов ойи бўлиши, масаланинг моҳиятига кириб, ўз иш фаолиятини ўзгартирмаган раҳбарларга қатъий чоралар кўрилиши кўрсатиб ўтилди.