ТОШКЕНТ, 20 фев — Sputnik. 14 февраль куни машинасозлик саноатини ривожлантиришга оид йиғилишда президент Шавкат Мирзиёев импорт автомобилларига қўйилган божларни аста-секин ноль фоизгача тушириш кераклигини маълум қилди. Бу ҳақда “Ўзбекистон 24” телеканалида эфирга узатилган “Менимча” кўрсатувида маълум қилинди.
“Секин-секин божхона тўловлари ноль фоиз бўлиши керак. Рақобат бўлиши керак. Арзон ва сифатли”, - деди давлат раҳбари.
Президент харидорлар олдиндан пул тўлаб қўйиб, машинасини бир йил кутиши адолатдан эмаслигини айтди.
“Оддий, меҳнаткаш фуқаромиз қанча-қанча машаққат билан йиққан пулини, кечирасиз-у, 1 йилга автосаноатга айлантириш учун бериб қўйиши бу адолатдан эмас”, - деди Мирзиёев.
Аввалроқ Шавкат Мирзиёев бу йиғилишда 1 майга қадар "UzAuto Motors" автомобиллари учун олдиндан тўлов миқдорини 85 фоиздан 50 фоизгача пасайтиришни топширгани ҳақида ёзган эдик. Бундан ташқари, импорт автомобиллари учун “растаможка”ни 2 баробарга (30 фоиздан 15 фоизга) пасайтириш бўйича топшириқ берилган. Тегишли қонун лойиҳасини Вазирлар маҳкамаси уч кунда ишлаб чиқиши керак эди.
Ўзбекистон автосаноатини яқин йилларда нималар кутаётганини қуйидаги инфографикамиздан батафсил билиб олишингиз мумкин.