ТОШКЕНТ, 1 дек – Sputnik. Ўзбекистон ҳуқуқни муҳофаза қилиш органлари молиявий пирамида ташкил этганликда гумонланаётган Украина фуқароси ва яна 4 кишини қўлга олди. Бу ҳақда ИИВ Тергов департаменти хабар қилмоқда.
Хабарда ёзилишича, 2020 йил 15 январь куни 29 ёшли Украина фуқароси М.М. бир гуруҳ шахслар билан тил бириктириб, Тошкентда "Golden Cash store" хорижий корхонасини таъсис этган.
Корхона Ўзбекистон фуқароларини корхонадан тилла ва кумуш буюмларни сотиб олиш йўли билан йиллик 260 фоизгача даромадни қўлга киритиш билан қизиқтирган.
Таъкидланишича, улар мижозлар олдидаги мажбуриятларини янги мижозлар ҳисобидан гўёки даромад сифатида “Golden cash store” пластик карталарига маълум миқдорда пул маблағларини ўтказиш билан қоплаб келишган.
Фирибгарлар республика бўйлаб кўплаб фуқароларнинг жуда кўп миқдордаги пулларини қўлга киритишган.
Корхона асосчиси ва яна тўрт киши ҳибсга олинган. Уларга нисбатан Ўзбекистон ЖКнинг 188.1-моддаси 2-қисми “в, г” бандлари (пул маблағларини ва (ёки) бошқамол-мулкни жалб этишга доир ноқонуний фаолият) билан жиноят иши қўзғатилган.
Фуқароларга етказилган зарар аниқланмоқда.