ТОШКЕНТ, 1 дек – Sputnik. Ўзбекистонда ҳайдовчиларга телефондан қулоқчин (наушники) орқали ва қўлларини ишлатмасдан гаплашиш имконини берадиган ускуналар орқали фойдаланишга рухсат берилди. Бу президент Шавкат Мирзиёев 30 ноябрь куни имзолаган қонунда кўзда тутилган.
Маъмурий жавобгарлик тўғрисидаги кодексига киритилган ўзгартиришларга кўра, энди ҳайдовчилар транспортни бошқаришда телефондан қулоқчинлар орқали ва қўлларини ишлатмасдан гаплашиш имконини берадиган ускуналар орқали фойдаланиши мумкин.
Ҳайдовчилар белгиланган тезликни ошириб юборганида қайд этилган тезликдан 5 км чегириб ташлаб жазо қўлланилади.
Ҳайдовчи ёнида паспорти ёки ID-картаси бўлганида транспортни бошқариш, рўйхатдан ўтказганликка оид ҳужжатларни, ишончномани, суғуртани ёнида олиб юриши талаб этилмайди (мазкур тартиб 2022 йил 1 мартдан кучга киради).
Шунингдек, транспорт салонининг олд қисмига монитор (дисплей) ўрнатганлик учун жавобгарлик бекор қилинди.
Автомобилда йўловчиларни лицензиясиз ташиганлик учун фуқароларга жарима БҲМнинг 30 баравари этиб белгиланди (илгари БҲМнинг 20 бараваридан 100 бараваригача эди).