ТОШКЕНТ, 8 ноя — Sputnik. Кучли совуқ об-ҳаво фонида газ етишмовчилиги юзага келса, келгуси қишда Ўзбекистон хориждан газ импорт қилишни бошлаши мумкин. Бу ҳақда Энергетика вазирлиги матбуот хизмати РИА Новости’га маълум қилди.
“Аномал совуқ об-ҳаво ва ички ресурслар етишмаса аҳолиси ва ижтимоий аҳамиятга эга объектларни таъминлаш мақсадида хориждан газ харид қилиниши мумкин”, — деди Энергетика вазирлиги вакили.
Бу борадаги якуний қарорни Ўзбекистон ҳукумати қабул қилади.
Энергетика вазирлиги маълумотларига кўра, келгуси куз-қиш мавсумида республикада ички истеъмолчиларга 32 миллиард 622 миллион куб метр газ етказиб бериш режалаштирилган бўлиб, ер ости омборларига эса 3 миллиард куб метрдан ортиқ газ қўйилган.
Ўзбекистондаги мавсумий газ истеъмолчилари рўйхатига газ қуйиш шохобчалари, иссиқхоналар, бир қатор қурилиш материаллари ишлаб чиқарувчи корхоналар ва умумий овқатланиш корхоналари киради.
“Ҳаво ҳарорати кескин пасайганда, қабул қилинган меъёрий-ҳуқуқий ҳужжатларга мувофиқ мавсумий истеъмолчилар муқобил ёқилғига ўтишлари шарт, бўшатилган газ ҳажмлари эса қўшимча равишда ижтимоий соҳа, стратегик аҳамиятга эга бўлган объектлар ва аҳолига эҳтиёжларини қондиришга йўналтирилади", - деб маълум қилинди вазирликда.