ТОШКЕНТ, 27 окт – Sputnik. Олий ва ўрта махсус таълим вазирлиги Низомий номидаги Тошкент давлат педагогика университети раҳбарияти ва масъулларига қатъий чоралар кўришини маълум қилди.
Аввалроқ бу олийгоҳнинг декан ўринбосари талаба қизга тегажоғлик қилиб, уни ойнадан итариб юборишда гумонланаётгани ва ҳибсга олингани хабар қилинган эди.
Қайд этилишича, вазирлик мазкур воқеа юзасидан ҳуқуқни муҳофаза қилувчи органлар билан ҳамкорликда ўрганиш ва суриштирув ишларини олиб бормоқда.
“Ўрганиш натижалари бўйича жиноятда гумонланувчи университет масъул ходимига нисбатан қонунчиликда белгиланган чоралар кўрилади. Шунингдек, ушбу ҳолатга йўл қўйган университет раҳбарияти ва масъулларига нисбатан ҳам қатъий ташкилий ва интизомий чоралар кўрилади”, - дейилган хабарда.
Вазирлик талаба қизларнинг шаъни ва номусига қарши ҳар қандай хатти-ҳаракатларни кескин қоралаши ва бу каби ҳолатларга қарши қатъий курашишини билдирган.
Тез орада бундай ҳолатларнинг олдини олиш мақсадида тезкор мурожаат қилиш имконини берадиган махсус портал яратилади ҳамда ишга туширилади.
Хабарда ўрганишлар натижаси бўйича объектив тафсилотлар қўшимча тарзда маълум қилиниши қўшимча қилинган.