ТОШКЕНТ, 20 сен – Sputnik. Ўзбекистон ташқи ишлар вазири Абдулазиз Камилов Россия ташқи ишлар вазири ўринбосари Андрей Руденкони қабул қилди.
ТИВ матбуот хизмати хабарига кўра, суҳбат чоғида Ўзбекистон-Россия кун тартибининг долзарб масалалари, аввал эришилган келишувларнинг амалга оширилиши ҳолати, шунингдек, бўлажак тадбирлар жадвали муҳокама қилинди. Россияга амалга ошириладиган олий даражада ташрифга тайёргарликни фаол давом эттиришга келишиб олинди.
Томонларнинг халқаро ва минтақавий ташкилотлар доирасидаги ҳамкорлиги юзасидан ҳам фикр алмашилди.
Бундан ташқари, Афғонистондаги сўнгги воқеаларни ҳисобга олган ҳолда минтақадаги мавжуд вазият ва унинг келгуси ривожи кўриб чиқилди.