ТОШКЕНТ, 16 сен — Sputnik. КХШТ аъзо-давлатлари раҳбарлари Коллектив хавфсизлик кенгаши йиғилиши давомида Афғонистондаги ҳарбий-сиёсий вазиятга алоҳида эътибор қаратдилар, деб баёнот қилди КХШТ бош котиби Станислав Зась.
КХШТ раҳбари АҚШ аскарлари ва НАТО ҳарбий контингенти чиқарилгач, Афғонистон республикасидаги вазият кескин ўзгарганига эътибор қаратди.
""Толибон"* радикал ҳаракати (Россияда тақиқланган террорчи ташкилот) ҳужуми, Афғонистон ҳудудининг, жумладан, давлат чегараси ва пойтахт ҳам деярли тўлиқ равишда толиблар назоратига ўтиши, шунингдек, мамлакатда ҳокимиятнинг ўзгариши Марказий Осиё минтақасидаги вазиятга сезиларли таъсир кўрсатади", - дея таъкидлади Зась.
Бу ҳолат КХШТ аъзоларида ташвиш келтириб чиқармоқда, деб қўшимча қилди у.
Бундан ташқари, Зась таъкидига кўра, Тожикистон Афғонистон билан энг узун чегарага эгалигини унутмаслик лозим, сабаби, чегаранинг асосий қисми тоғли, одам қадами етиши қийин бўлган ҳудудлардан ўтган.
КХШТ бош котиби тожик-афғон чегарасида янги кенг кўламли машғулотлар ўтказилиши ҳақида эълон қилди. Жумладан, "Поиск", "Эшелон", "Взаимодействие" ва "Кобальт" деб номланган манёврларни ўтказиш режалаштирилмоқда.
Aфғонистондаги вазият туфайли Коллектив хавфсизлик кенгаши мажлиси иштирокчилари Марказий Осиёда коллектив кучларни оператив жойлаштириш режасига аниқлик киритиб олдилар. Шунингдек, ҳарбий контингент таркиби ва махсус кучлар отрядларини шакллантириш масалалари ҳам муҳокама қилинди, деди Зась.