ТОШКЕНТ, 13 июл — Sputnik. Ижтимоий тармоқларда Москва шаҳрида меҳнат мигрантлари ўртасида оммавий муштлашув акс этган видеолар тарқалмоқда.
Вазиятга ойдинлик киритиш мақсадида Ташқи меҳнат миграцияси агентлигининг Москвадаги ваколатхонаси ходимлари республиканинг ушбу давлатдаги элчихонаси вакиллари билан биргаликда воқеа жойига бориб, Россия Федерацияси Ички ишлар вазирлиги ходимлари билан мулоқотда бўлиб, вазиятни ўрганди.
Дастлабки маълумотларга кўра, ушбу оммавий муштлашувда Ўзбекистон Республикаси фуқаролари иштирок этмаган.
Эслатиб ўтамиз, куни кеча Москвада “Кузьминки” метро бекати яқинида мигрантлар иштирокида оммавий муштлашув юз берди. Ҳодиса Зеленодольская кўчасида содир бўлган. Муштлашувда 200 нафаргача мигрант иштирок этган.