ТОШКЕНТ, 2 июл - Sputnik. Украинанинг Винницк вилоятидан бўлган ўн яшар қизалоқ Ира Химич қариликдан вафот этди. Қизалоқнинг ўлими ҳақида унинг онаси Facebook ижтимоий тармоғида хабар қолдирган.
"Ирочка дунёдан кўз юмди. Кеча унинг юраги уришдан тўхтади. Мени кечир, қуёшим, бу сафар сени қутқара олмадим", — деб ёзган аёл.
Қизалоқ прогериядан - ўта ноёб генетик бедаво касалликдан азият чеккан - бу дард шунингдек, Хатчинсон-Гилфорд синдроми сифатида ҳам машҳур.
Ушбу касалликка чалинганларда организмдаги қариш жараёни туфайли тери ва ички аъзолар ўзгариши юз беради - чақалоқ бир неча ой давомида нормал ривожланиб, сўнгра ундаги қариш аломатлари тезлашиб кетади.
Болалар прогерияси туғма бўлиши мумкин бўлса-да, аксарият беморларда клиник белгилар одатда 2-3 ёшда намоён бўла бошлайди. Бунда бола ўсиши бирдан сусаяди, дерма, териости ҳужайралари, айниқса юз ва оёқларда атрофик ўзгаришлар қайд этилади.
Тери юпқалашади, ажинсимон тусга киради, бемор тишлари, сочлари ва тирноқларида дистрофик жараёнлар бошланади.
Прогериядан азият чекувчилар бир йил ичида биологик жиҳатдан ўн йилга қаришлари мумкин. Болалар прогериясида ўртача умр давомийлиги - 13 ёшни ташкил этади.
Иринага бу ташхис у 5 ёшга тўлганида қўйилган.