ТОШКЕНТ, 13 июн — Sputnik. АҚШ президенти Жо Байден Корнуолл графлигидаги "Катта еттилик" (G7) саммитида қироллик протоколини бузди. Бу ҳақда “Daily Mail” ва “Mirror” нашрлари хабар бермоқда.
Қироллик протоколига кўра, Британиядаги барча тантанали ва расмий тадбирларга меҳмонлар қироллик оиласидан олдин келишлари шарт. Аммо Байден ва унинг рафиқаси Жилл тадбирга Британия қироличаси Елизавета II дан кейин 5 дақиқа ўтиб келган. Қиролича билан шаҳзодалар Чарлз ва Уилям ҳамда уларнинг рафиқалари Камилла Паркер Боулз ва Кейт Миддлтон ҳам келган.
Журналистларнинг қайд этишича, Америка президенти кечикиб келишидан қиролича норозилик билдирмаган ва меҳмонлар билан хушмуомала бўлган.
Байден АҚШ президенти сифатида илк хорижий сафарга чиққан. У 10 июнь куни Англиянинг Карбис-Бэй шаҳрига ташриф буюриб, Буюк Британия бош вазири Борис Жонсон билан учрашди. 13 июнь куни Байден Брюсселга НАТОга аъзо мамлакатлар саммитига боради. 16 июнь куни Швейцарияда АҚШ етакчисининг Россия президенти Владимир Путин билан учрашуви режалаштирилган.