ТОШКЕНТ, 30 май — Sputnik. “Ўзкомназорат” давлат инспекцияси интернет тариф режалари ва хизматларини тақдим этишда "-гача" қўшимчаларидан фойдаланиш бўйича кўрсатма берди. Бу ҳақда идора матбуот хизмати хабар қилмоқда.
“2021 йил 1 июндан бошлаб тариф режалари ва хизматлари тўғрисидаги маълумотларда интернет тезлиги учун белгиланган “-гача” (“до...”) қўшимчалари ўрнига аниқ ва тушунарли маълумот бериш бўйича кўрсатма берилди", — дейилади хабарда.
Таъкидланишича, бу интернет ва телекоммуникация хизматларини кўрсатувчи оператор ва провайдерлар ҳамда хўжалик юритувчи субъектларга телекоммуникация хизматларини узлуксиз, сифатли ва шартномаларда белгиланган ҳажмда (тезликда) кўрсатиш мақсадида амалга оширилмоқда.