ТОШКЕНТ, 17 май — Sputnik. Президент матбуот котиби Шерзод Асадов бугун ўтказилган брифингда Шарқий Қуддусдаги вазият ҳақида тўхталди.
Унинг сўзларига кўра, Ўзбекистон Шарқий Қуддусдаги вазиятни кескин тус олишидан жуда ҳавотирда.
Томонларни зўравонликка чек қўйиш, қон тўкилишини дарҳол тўхтатиш ва бу борада бор имкониятларни сафарбар этиш керак деб ўйлаймиз. Бундан ташқари, Ал-Ақсо масжиди ва Қуддусдаги қолган бошқа муқаддас қадамжоларнинг даҳлсизлиги - статус-кво бўлган ҳолга қайтиш керак ва тикланиш керак, деб биламиз
Асадовга кўра, Фаластин-Исроил муаммоси халқаро меъёрий-ҳуқуқий ҳужжатлар доирасида ҳал этилиши лозим.
"Умуман олганда, Фаластин-Исроил муаммоси халқаро меъёрий-ҳуқуқий ҳужжатлар доирасида, хусусан БМТнинг тегишли резолюциялари ва биз кўп йиллардан бўён шуни қўллаб-келаётган тамойил бўлмиш “икки халқ учун икки давлат” тамойили асосида ечилиши керак деб ўйлаймиз”, - деди президент матбуот котиби.
Эслатиб ўтамиз, ўтган ҳафтада Исроил ва Фаластиннинг Ғазо сектори чегарасидаги вазият кескин кескинлашди. 12 май тонгида Хамас ҳаракати Исроил ҳудудига мингдан ортиқ ракета учирди. Тел-Авив Ғазо секторига зарба беришда давом этмоқда.
Шу вақт ичида Фаластиннинг Ғазо секторидан Исроил томон 3 мингдан ортиқ ракета отди. Исроил эса Ғазо томон 1,5 мингдан ортиқ ракета отди.
Исроилда 10 киши вафот этди, 50 га яқин киши жиддий яраланди. Фаластинда 192 киши ҳалок бўлди, улардан 58 нафар бола.