ТОШКЕНТ, 12 май — Sputnik. Ўзбекистон COVID-19га қарши яна бир - Sinopharm Хитой вакцинасини олиб келиш масаласини кўриб чиқмоқда.
Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Атабеков бу ҳақда онлайн брифингда айтди.
Ўзбекистон ҳукумати бу вакцинага COVAX дастури орқали буюртма бериши мумкин.
Атабековнинг сўзларига кўра, май ойи бошида БССТ Sinopharm фавқулодда вазиятда фойдаланиш учун маъқуллади - бу қарор эмлаш кампаниясини сусайтирмаслик учун республика буюртма бериши мумкин бўлган вакциналар рўйхатини кенгайтиради.
Аввалроқ, COVAX дастури доирасида 660 минг дозали AstraZeneca вакцинаси Ўзбекистонга етказиб берилганди. Иккинчи партия июн ойида кутилмоқда.
Шунингдек, апрел охирида Zhifei Longcom Biopharmaceutical Co. Ltd компанияси томонидан ўзбекистонлик мутахассислар ҳаммуаллифлигида яратилган ZF-UZ-VAC2001 вакцинасининг яна 1 миллион дозаси Хитойдан Ўзбекистонга олиб келинганди.