ТОШКЕНТ, 12 май — Sputnik. UzAirways миллий авиакомпаниясининг шўба корхонаси - Uzbekistan Helicopters оператори 4 дона Airbus H125 ва H130 вертолётларига буюртма берди. Бу ҳақда “АвиаСтат” агентлиги хабар қилди.
Uzbekistan Helicopters раҳбари Азиз Сафиуллин таъкидлашича, Airbus H125 ва H130 вертолётлари парвоз хизматлари сифатини янада оширади.
Airbus Helicopters компаниясининг Ўзбекистондаги савдо директори Ромен Лананинг сўзларига кўра, Ecureuil оиласига кирувчи кўп функцияли ва ишончли вертолётлар республика иқлим шароитига мос келади.
H125 (илгари AS350 B3e) баланд тоғли ҳудуд ва иссиқ иқлим шароитида учиши мумкин. Вертолёт йўловчилар учун 6та ўриндиқ, учувчилар учун 1та ёки 2та ўриндиққа эга.
H130 вертолёти йўловчи ва VIP-ташувлар, экскурсия парвозлари, санитария авиация ва кузатув ишларини амалга ошириш учун мўлжалланган. Салон 1та учувчи ва 7та йўловчи ўриндиғига эга. Тиббиёт ходимлари учун модел ҳам бор.