ТОШКЕНТ, 11 май — Sputnik. Давлат солиқ қўмитаси бирлашган касаба уюшмаси вакиллари ҳамда Олий Мажлис Қонунчилик палатаси депутати Расул Кушербаев ўртасидаги масала судгача олиб борилмасдан, тўхтатишга қарор қилинди. Бу ҳақда қўмита матбуот хизмати хабар қилди.
Маълум қилинишича, томонлар учрашган ва музокаралар давомида юзага келган вазиятни муҳокама қилишган.
“Ҳар икки томоннинг ҳам мақсади ва маслаги бирлиги, яъни мамлакатимиз тараққиёти ва халқимиз турмуш фаровонлиги йўлида хизмат қилиш эканлиги таъкидланди. Масалани судгача олиб бормасдан, тўхтатишга қарор қилинди”, - дейилган хабарда.
Эслатиб ўтамиз, Давлат солиқ қўмитаси Расул Кушербаевнинг Human.uz ахборот порталидаги “Сўз блогерларга” кўрсатувида айтган гапларини ҳақоратомуз деб ҳисоблаб, уни судга берган эди. Даъво аризасида депутатнинг ҳатти-ҳаракатлари солиқ органларига 4,6 млрд сўм зарар етказганлиги кўрсатилган эди.