ТОШКЕНТ, 9 май - Sputnik. Истанбулда қийин аҳволда қолган 6 нафар Ўзбекистон фуқароси ватанга қайтарилди, деб хабар бермоқда Ташқи меҳнат миграцияси агентлиги матбуот-хизмати.
"Туркия Республикасининг Истанбул шаҳрига ишлаш мақсадида бориб, пандемия шароитида молиявий қийин аҳволда қолган ва коронавирус касаллигини бошидан ўтказган Ўзбекистон фуқаролари – Т.И, М.Ю ва уларнинг фарзандлари Ватанга қайтарилди", - дейилади хабарда.
Улар Ташқи меҳнат миграцияси агентлиги, мамлакатнинг Истанбул шаҳридаги Бош консулхонасига ёрдам сўраб мурожаат қилган.
Мазкур мурожаатларни қаноатлантириш мақсадида Ташқи меҳнат миграцияси агентлиги, Бош консулхона ва Халқаро миграция ташкилоти ҳамкорлигида белгиланган чора-тадбирлар амалга оширилиб, фуқаролар Истанбул-Тошкент йўналишидаги авиарейс орқали Ўзбекистонга олиб келинди.
Молиявий қийин аҳволда қолган фуқароларни Тошкент халқаро аэропортида Ташқи меҳнат миграцияси агентлиги ва Халқаро миграция ташкилоти масъул ходимлари кутиб олди ва улар яшаш манзилига кузатилди.