ТОШКЕНТ, 19 апр — Sputnik. Жиззах вилояти Бахмал туманида Ўзбекистон президенти Шавкат Мирзиёевни ижтимоий тармоқлар орқали ҳақоратлаган шахсга нисбатан жиноий иш очилди. Бу ҳақда вилоят прокуратураси матбуот хизмати хабар қилди.
Хабарда ёзилишича, 52 ёшли фуқаро В.К. YouTube ва Facebook ижтимоий тармоқларида “V.К.” (номи қисқартирилган) профил очган. Бу профиллари орқали турли мавзуларда интернет тармоқлари орқали тўғридан-тўғри чиқишлар қилган.
Эркак ўз чиқишларида президент раҳбарлигида амалга оширилаётган ислоҳотларни кенг жамоатчиликка нотўғри талқин қилиб, мамлакат президентини интернет тармоқлари орқали ҳақоратлаган. Кейин президентнинг обрўсига путур етказувчи ва камситувчи маълумотларни тарқатган.
Ҳозир унга нисбатан Жиноят кодексининг 158-моддаси 3-қисми (Ўзбекистон президентини интернет бутунжаҳон ахборот тармоғидан фойдаланган ҳолда ҳақоратлаш ёки унга туҳмат қилиш) билан жиноят иши қўзғатилган.
Тергов ҳаракатлари олиб борилмоқда.
Эслатиб ўтамиз, аввалроқ Ўзбекистонда президентни интернетда ҳақоратлаш ёки унга туҳмат қилганлик учун жиноий жавобгарлик белгилангани хабар қилинган эди. Бу жиноят учун 3 йилгача ахлоқ тузатиш ишлари ёки 2 йилдан 5 йилгача озодликни чеклаш ёхуд 5 йилгача қамоқ жазоси кўзда тутилган.