ТОШКЕНТ, 14 апр — Sputnik. Ўзбекистон Марказий сайлов комиссияси президент сайловига тайёргарлик кўриш бўйича асосий тадбирлар дастурини тасдиқлади.
Асосий тадбирлар дастурида сайлов жараёнига замонавий ахборот-коммуникация технологияларини жорий қилиш, ушбу жараёнда ахборот-тушунтириш ишларини ташкил этиш, сайловга тайёргарлик жараёнини коронавирус пандемияси шароитини ҳисобга олган ҳолда ўтказиш бўйича аниқ вазифалар белгиланди.
МСК мажлисида Ўзбекистон президентлигига кўрсатилган номзодни қўллаб-қувватловчи имзоларни тўплаш ва имзо варақалари тўғри тўлдирилганлигини текшириш тартиби, номзодларнинг сайловолди ташвиқотини олиб бориш тартибига доир низомлар қабул қилинди.
Эслатиб ўтамиз, Ўзбекистонда президент сайловлари декабрь ойидан октябрга кўчирилган эди. Сайловлар жорий йил 24 октябрь куни бўлиб ўтиши кутилмоқда.