ТОШКЕНТ, 1 апр — Sputnik. “Aksa Enerji” турк компанияси Тошкент вилоятининг Қибрай туманида умумий қуввати 470 МВт бўлган иккита иссиқлик электр станциясини (ИЭС) қуради. Бу ҳақда Энергетика вазирлиги хабар қилмоқда.
Улар тумандаги 7 гектар ер майдонида барпо этилмоқда. Лойиҳанинг умумий қиймати 300 миллион долларни ташкил қилади. Уни “Aksa Enerji” тўлиқ молиялаштирилади.
Станцияларни жорий йилнинг тўртинчи чорагида ишга тушириш режалаштирилган. Йилига 3,9 миллиард киловатт соат электр энергияси ишлаб чиқарилади.
Таъкидланишича, ушбу лойиҳани амалга ошириш ҳисобига йилига 550 миллион метр куб табиий газ тежалади.
Шунингдек, "Aksa Enerji” Бухоро вилоятида газ-поршенли электр станциясини қуриш лойиҳасини бошлаган. У учун ер майдонида ўрганиш ишлари олиб борилмоқда. Бу ИЭСнинг умумий қуввати 270 МВт бўлади.