ТОШКЕНТ, 30 мар — Sputnik. Ўзбекистонда аҳолини коронавирусга қарши эмлаш 1 апрелдан бошланади. Санитария-эпидемиологик осойишталик ва жамоат саломатлиги хизмати раҳбари ўринбосари Нурмат Отабеков эмлаш ишлари биринчи бўлиб қайси ҳудудларда бошланишига аниқлик киритди.
Мамлакатга CОVAХ дастури орқали 660 минг доза “AstraZeneca” вакцинаси олиб келинган. Бундан ташқари, 27 март куни 1 миллион дозада ZF-UZ-VAC2001 ўзбек-хитой вакцинаси келтирилди. Аҳолини коронавирусга қарши оммавий эмлаш иккала турдаги вакцина билан бир пайтнинг ўзида бошланади.
Отабековнинг сўзларига қараганда, апрель ойида биринчи галда Қорақалпоғистон Республикаси, вилоятлар марказлари, Тошкент шаҳри ва бошқа катта шаҳарларда оммавий эмлаш ўтказилади. Май ойида туман марказлари ва кичик шаҳарлар аҳолиси эмланади. Июнь ойида эса бошқа ҳудудлар оммавий эмлаш билан қамраб олинади.
“Мабодо май-июнь ойларида эмланиши режалаштирилган хавф ости гуруҳига мансуб аҳоли қатламида коронавирусга қарши эртароқ эмланишга ҳоҳиш пайдо бўлса, у ҳолда улар Қорақалпоғистон Республикаси, вилоятлар марказлари, Тошкент шаҳри ва бошқа катта шаҳарларда жойлашган эмлаш пунктларига мурожаат қилишлари ва белгиланган кунда келиб эмланишлари мумкин бўлади”, - дея хулоса қилди Отабеков.