ТОШКЕНТ, 16 мар — Sputnik. “Турон” клуби мураббийи Ислом Исмоилов “Сўғдиёна” клубига қарши баҳсдан кейин интервью бериш вақтида одоб-ахлоқ қоидаларини бузганлиги учун 2 та ўйинга четлаштирилди. Ўзбекистон футбол ассоциацияси Тартиб-интизом қўмитаси шундай қарор қабул қилди. Бу ҳақда ЎФА матбуот хизмати хабар бермоқда.
Шунингдек, клуб президенти Aбдуваҳоб Aҳмадалиев мазкур баҳсдан кейинги флеш-интервю чоғида ўз фикрларини қўпол тарзда билдиргани учун жаримага тортилган.
Бундан ташқари, қўмита йиғилишида Ўзбекистон Суперлигаси 1-тури доирасидаги “Машъал” футболчиси Муҳаммад Юлдашев ўйинда оёқ кийимининг таг қисми билан рақиб жамоаси “Бунёдкор” футболчисининг кўкрак қисмига тепгани учун 2 та ўйинга четлаштирилган.
Эслатиб ўтамиз, “Сўғдиёна”дан мағлуб бўлгандан кейин (1:0) Ислом Исмоилов ҳакамлар ишини қаттиқ танқид қилган эди. “Турон” президенти Aбдуваҳоб Aҳмадалиев ҳам аччиқ-аччиқ гапларни гапирганди.
ЎФA Сўғдиёна” – “Турон” учрашувини бошқариб борган бош ҳакам Виктор Серазитдинов хатти-ҳаракатларини ўрганиб чиқиб, уни номуайян муддатга ҳакамликдан четлатган эди.