ТОШКЕНТ, 8 мар — Sputnik. 7 март куни Теҳронга ташриф билан келган Ўзбекистон Республикаси Ташқи ишлар вазири ўринбосари Фурқат Сидиков Иқтисодий ҳамкорлик ташкилоти (ИҲТ) Бош котиби Ходи Сулаймонпур билан учрашди.
© МИД Узбекистана
Томонлар Ўзбекистон ва ИҲТ ўртасидаги ҳамкорликнинг ҳозирги ҳолати ва истиқболларини муҳокама қилдилар, режалаштирилган қўшма тадбирлар, хусусан, 2021-йилда ташкилотга аъзо давлатлар қишлоқ хўжалиги ва туризм вазирларининг навбатдаги учрашувини Ўзбекистонда ўтказиш тўғрисида фикр алмашдилар.
4-мартда видеоконференцалоқа шаклида бўлиб ўтган Иқтисодий ҳамкорлик ташкилотининг 14-саммитида Ўзбекистон президенти Шавкат Мирзиёев томонидан илгари сурилган ташаббусларни амалга оширишнинг амалий жиҳатларига алоҳида эътибор қаратилди.
ИҲТ Бош котиби Ўзбекистон раҳбарининг таклифлари ташкилотга аъзо мамлакатлар томонидан катта қизиқиш ва қўллаб-қувватлашга сабаб бўлганлигини таъкидлади.
Ўзбекистонда амалга оширилаётган кенг кўламли иқтисодий ислоҳотлар доирасида тадбиркорлар ва хорижий инвесторларнинг манфаатларини ҳимоя қилиш бўйича изчил чора-тадбирлар амалга оширилаётгани қайд этилди.
Шу нуқтайи назардан сўнгги йилларда Ўзбекистоннинг тузилмага аъзо давлатлар билан умумий товар айламаси ҳажми бир ярим бараварга ошиб, 9 миллиард АҚШ долларини ташкил этгани таъкидланганди. Ўзбекистонда ИҲТга аъзо мамлакатларнинг 5 мингга яқин корхоналари фаолият кўрсатмоқда.
Ташкилот Бош котиби жорий йил Тошкент шаҳрида бўлиб ўтадиган “Марказий ва Жанубий Осиё: минтақавий боғлиқлик. Таҳдидлар ва имкониятлар” мавзусидаги халқаро конференцияга таклиф қилинди.
Музокаралар чоғида, Ўзбекистон ва ИҲТ ўртасидаги ўзаро алоқаларнинг бошқа долзарб масалалари кўриб чиқилди.