ТОШКЕНТ, 26 сен - Sputnik. Ўзбекистон Бош вазир ўринбосари, Samarkand Half Marathon халқаро хайрия марафони ташкилий қўмитаси раиси Азиз Абдуҳакимов Самарқанд ярим марафонининг ташкилий масалаларига бағишланган онлайн йиғилиш ўтказди.
Унда вилоятлар ҳокимлари ўринбосарлари, Молия вазирлиги, ТИВ ва ИИВ, ФВВ, Транспорт вазирлиги ва Миллий гвардия раҳбар ўринбосарлари қатнашишди.
Йиғилиш доирасида Самарқанд ярим марафонини ўтказиш билан боғлиқ қатор масалалар муҳокама қилинди.
Азиз Абдуҳакимов бу йил ярим марафон виртуал форматда ўтиши, Самарқандда эса турли мамлакатларнинг профессионал атлетлари ғолиблик учун кураш олиб боришини таъкидлади.
Пойга тўғридан-тўғри эфирда узатилади. Мусобақа вилоятлар ўртасида ўтказилиб, иштирокчилар ўз ҳудуди биринчи ўринни эгаллаши учун энг катта масофани босиб ўтиши керак бўлади.
Илк марта ярим марафон иштирокчилари учун икки қўшимча формат тақдим этилади: болалар пойгаси ва скандинавияча юриш.
Жорий йилда ярим марафонда Бош вазир ўринбосари Азиз Абдуҳакимов, Самарқанд вилояти ҳокими Эркинжон Турдимов, Маданият вазири Озодбек Назарбеков, Ўзбекистонда хизмат кўрсатган артист Севара Назархон, гимнастикачи, Олимпия ўйинлари совриндори Оксана Чусовитина, боксчи, 2016 йилги Олимпия ўйинларининг кумуш медаль совриндори Шаҳрам Ғиёсов ва бошқалар қатнашади.
Samarkand Half Marathon’ни ўтказишдан тушган барча маблағлар Ўзбекистондаги аутизмдан азият чекувчи болалар интернатларидан бирида бадиий студия очишга йўналтирилади, хоҳловчилар учун эса маъруза ва семинарлар ҳам ўтказиш режалаштирилган.
Марафон одамларга аутизмдан азият чекувчи кишилар дунёси нақадар ранг-баранглиги ва бунга эътибор қаратиш қанчалик муҳим эканини англашда ёрдам беради.
Йиғилиш доирасида мамлакатнинг барча ўқув муассасаларида инклюзияга эътибор қаратиш алоҳида муҳокама қилинди. Унда таълим тизими ўқувчилар билан суҳбат форматига мослаштирилиши лозимлиги, бу инклюзивлик ғоясини интерфаол шаклда максимал қулай даражада етказиб бериши қайд этилди.
Шу кунларда бутун республика бўйлаб Samarkand Half Marathon халқаро хайрия пойгаси регистрацияси очилишига бағишланган #moviynurtarat акцияси бўлиб ўтди. Унда шаҳарлардаги йирик иншоотлар ва меъморий обидалар аутизмдан азият чекувчи кишиларга ҳайрихоҳлик белгиси сифатида ҳамда уларнинг ижтимоий муҳитга интеграциялашувида дуч келувчи муаммоларига эътиборни қаратиш мақсадида мовий рангда нур таратди.
Samarkand Half Marathon – Маданият ва санъат жамғармаси томонидан Маданият вазирлиги, Туризмни ривожлантириш давлат қўмитаси ҳамда Самарқанд вилояти ҳокимлиги кўмагида ташкил қилинувчи, ҳар йили ўтказилувчи хайрия пойгаси.
Хайрия пойгасига 1 ноябрь куни старт берилади. Унда бутун дунё мамлакатлари фуқаролари иштирок этиши мумкин.