ТОШКЕНТ, 14 июн — Sputnik. Андижон вилоятининг Хўжаобод туманидаги тикув цехида ёнғин юзага келди. Бу ҳақда Фавқулодда вазиятлар вазирлиги матбуот хизмати хабар қилмоқда.
Маълум қилинишича, 14 июнь куни тахминан соат 01:44 да “Хўжаобод Файз-М” МЧЖ ҳудудида ёнғин содир бўлганлиги тўғрисида маълумот келиб тушган.
Ёнғин оқибатида тахминан 1200 м2 майдонининг ички қисмидаги тикув дастгоҳлари ва ярим тайёр маҳсулотларига зарар етган.
Мазкур вазият юзасидан вилоят ФВБнинг раҳбарияти бошчилигида 13 та ёнғин ўчириш экипажи воқеа жойига етиб борган. Олиб борилган тезкор чоралар натижасида ёнғин соат 02:15 да ўраб олиниб, 03:45 тўлиқ бартараф этилди.
Қутқарувчиларнинг саъй-ҳаракатлари туфайли мазкур цехнинг ертўласидаги қиймати 3 миллиард сўмлик тайёр маҳсулотлар, 6 та “Исузи” автобуси сақлаб қолинди.
Ҳозирда ёнғиннинг келиб чиқиш сабаблари ўрганилмоқда.