ТОШКЕНТ, 9 фев — Sputnik. Божхоначилар 153 миллион сўмлик заргарлик буюмларини яширинча олиб ўтиш режасини фош этишди.
Божхона қўмитаси хабарига кўра, Тошкент халқаро аэропортига хориждан учиб келган фуқаро Б.К. белгиланган тартибда божхона назоратидан ўтказилган.
Таъкидланишича, унинг юклари орасида божхона назоратига тақдим этилмаган ва жисмоний шахслар учун белгиланган божхона тўловларисиз олиб кириш меъёридан ортиқча бўлган 460,52 грамм сариқ металлдан ясалган заргарлик буюмлари борлиги аниқланган.
Буюмларнинг умумий қиймати 153 миллион сўм экани айтилган.
Ҳозирда ҳолат юзасидан божхона органлари томонидан суриштирув ҳаракатлари давом эттирилмоқда.