ТОШКЕНТ, 2 фев — Sputnik. Қозоғистон ҳукумати ўз фуқароларини Хитойнинг Ухань шаҳридан эвакуация қилди. Бу ҳақда Қозоғистон бош вазирининг матбуот хизмати хабар қилди.
Таъкидланишича, Қозоғистон фуқаролари 2 февраль куни ватанга олиб келинган. Парвоз вақтида уларга барча ҳимоя воситалари билан таъминланган шифокорлар ҳамроҳлик қилишган.
“Қозоғистон Республикаси фуқароларининг саломатлиги хавфсизлигини таъминлаш мақсадида Фавқулодда тиббиёт миллий мувофиқлаштириш маркази 83 нафар қозоғистонликларни ватанга олиб келди. Улардан 80 нафари Хитойнинг Ухань шаҳрида бўлган талабалардир”, - дейилган хабарда.
Олиб келинганларнинг саломатлиги тиббий текширувдан ўтказилгандан кейин улар пойтахт касалхонасининг махсус ажратилган корпусида 14 кунлик карантинга жойлаштирилган.
Шунингдек, Қозоғистон Қирғизистон, Беларусь ва Арманистон ҳукуматининг мурожаатига биноан ушбу мамлакат фуқароларини Ухань шаҳридан эвакуация қилган.