ТОШКЕНТ, 20 янв — Sputnik. Австралиянинг Голд-Кост шаҳрида Жануби-Шарқий Осиё математика олимпиадасида (SEAMO X 2020) ўзбекистонлик ўқувчилар олтин ва бронза медалларни қўлга киритишди. Бу ҳақда Халқ таълими вазирлиги ахборот хизмати хабар қилди.
Олимпиада 17-20 январь кунлари бўлиб ўтган. Унда давлат ва нодавлат мактабларининг 1-11-синф ўқувчилари иштирок этишлари мумкин. 2020 йилда 18 та давлатдан жами 1044та иштирокчи қатнашди.
Таъкидланишича, мазкур халқаро фан олимпиадаси Сингапур давлатининг Терри Чю институти томонидан ташкил этилган.
Жумладан, SEAMO халқаро математика олимпиадасида Бухоро вилоятининг Қоракўл Халқаро мактаби 10- синф ўқувчиси Бекзод Нуриддинов олтин медалга сазовор бўлган.
Тошкент вестминстр Халқаро мактабининг 6-синф ўқувчиси Ҳорун Салиев эса бронза медалини қўлга киритган.
Шунингдек, Хоразм вилояти, Угранч шаҳри, 10-мактаб ўқувчиси Шаҳзода Жумабоева, Тошкент шаҳри, 91-мактабнинг 10-синф ўқувчиси Йўлчиев Темурбек ҳамда Наманган вилояти, Мингбулоқ туманидаги 45-мактабнинг 6-синф ўқувчиcи Санжарбек Ғуломжоновга фахрий ёрлиқлар топширилган.